Policia e Durrësit ka arrestuar këtë të martë shtetasin Agron Bejdollin, i cilësuar si krahu i djathtë i Aleksandër Lahos i njohur ndryshe si “Rrumi i Shijakut”.
Bejdolli ishte shpallur në kërkim pas pengmarrjes së dy vëllezërve, Indrit dhe Gentian Beqiraj më 2 tetor 2022.
Ndaj tij gjykata e Durrësit, kishte caktuar masën e sigurisë ‘arrest me burg’ për akuzën “heqje e paligjshme të lirisë (pengmarrje)” në bashkëpunim me “Rrumin e Shijakut”. 33-vjeçari u arrestua në shtëpinë e një kushëriri të tij në Spitallë të Durrësit.
Bejdolli akuzohet se më datë 02.10.2022, në Maminas, në bashkëpunim me shtetas të tjerë, i ka hequr lirinë shtetasit Indrit Beqiraj. Ky i fundit ishte duke udhëtuar me motor bashkë me vëllain e tij Gentianin, kur u mor peng nga Bejdolli.
Por kur ai e kuptoi se po ndiqej nga policia e la të lirë Beqirajn, i cili menjëherë pas shpëtimit u arrestua për shkak të aktivitetit të tij kriminal, kryer në bashkëpunim me vëllain.
Arrestimi i tyre solli zbardhjen e disa prej ngjarjeve kriminale që kanë ndodhur por edhe që ishin porositur e nuk ndodhën.
Si rrjedhojë u arrestuan 14 eksponentë të krimit, ndërsa 5 të tjerë u shpallën në kërkim. Mes këtyre të fundit ishte dhe 33 vjeçari Bejdolli.
