Lezhë- Terrorizuan banorët me të shtëna arme, arrestohen pas ndjekjes policore 2 të rinjtë e dyshuar. Policia e Lezhës njoftoi sot se ka kryer një aksion të menjëhershëm pas sinjalizimit prej qytetarëve dhe krismave që u dëgjuan në lagjen “Skënderbeg”.
Fillimisht u dyshua për një konflikt mes personave, por nga verifikimet rezultoi se ishin të paktën 6 të shtëna në ajër dhe në lëvizje me makinë. Gjatë hetimeve dhe operacionit u zbulua se autorët e dyshuar dhe ndaluar janë Erion Berisha, 32 vjeç dhe Petrit Neziri, 24 vjeç, banues në Lezhë.
Gjithashtu një person i tretë po hetohet në gjendje të lirë, që është njëkohësisht dhe pronari i mjetit.
Policia tha se “gjeti dhe sekuestroi pistoletën sportive të përdorur, e cila kishte një fishek manovër në karikator, si dhe automjetin me të cilin këta shtetas lëviznin”.
Nga verifikimet dhe dëshmia e personit të tretë, E.G., 28 vjeç, rezulton se dy të dyshuarit i kishin marrë atij automjetin për të lëvizur në qytet, por më pas qëlluan edhe me armë. Pronari i mjetit u la më tej për ndjekje në gjendje të lirë.
Dosja për ngjarjen i kaloi prokurorisë vendore dhe hetimet mbeten ende aktive. Në cilësinë e provës materiale, u sekuestruan 6 gëzhoja të gjetura në vendngjarje.
